قوباد تاڵەبانى: حکومەتی هەرێم و فیدرال سەبارەت بە پرسی هەناردەکردنی نەوت و گاز ناکۆکن

لە کۆبوونەوەیەکدا لەگەڵ وەزیرى دەرەوەى یۆنان، قوباد تاڵەبانى لەبارەى هەناردەکردنى گازى سروشتیی لەلایەن هەرێمەوە وتى، “ڕاستە دەرفەتی مێژوویی لەبەردەم کوردستاندایە، بەڵام حکومەتی هەرێم و حکومەتی فیدرال سەبارەت بە پرسی هەناردەکردنی نەوت و گاز ناکۆکن”.

فەرمانگەى میدیا و زانیاریی حکومەتى هەرێمى کوردستان ڕایگەیاندووە، ئەمڕۆ شەممە، قوباد تاڵەبانی، جێگری سەرۆکوەزیرانى هەرێم لە پەراوێزی بەشداریکردنی لە کۆڕبەندی نێودەوڵەتیی ئابوریی دێلفی لە یۆنان، لەگەڵ نیکۆس دێندیاس، وەزیری دەرەوەی ئەو وڵاتە کۆبووەوە و “پێکەوە پرسی وزە و پەرەپێدانی پەیوەندیی ئابوریی نێوان هەردوو وڵاتیان تاوتوێ کرد”.

لە تەوەرێکی سەرەکیی کۆبوونەوەکەدا، باس لە پرسی وزە و پێگەی کوردستان لەڕووی نەوت و گازەوە کرا، وەزیری دەرەوەی یۆنان ئاماژەی بەوەداوە، “کوردستان لەبەردەم دەرفەتێکی مێژووییدایە بۆ هەناردەکردنی نەوت و گاز بۆ ئەوروپا”، وەک فەرمانگەى میدیا و زانیاری ئاشکرای کردووە.

لەوبارەیەوە قوباد تاڵەبانى ڕایگەیاندووە، “ڕاستە دەرفەتی مێژوویی لەبەردەم کوردستاندایە، بەڵام حکومەتی هەرێم و حکومەتی فیدرال سەبارەت بە پرسی هەناردەکردنی نەوت و گاز ناکۆکن، هەربۆیە پێویستە سەرەتا کێشە یاساییەکانی نێوان حکومەتی هەرێم و حکومەتی فیدرال چارەسەر بکرێن بۆ ئەوەی هەرێمی کوردستان بتوانێت بەبێ کێشە مامەڵە لەگەڵ ئەم پرس و سامانە سروشتییە بکات”.

فەرمانگەى میدیا و زانیاریی حکومەتى هەرێم ڕایگەیاندووە، لە تەوەرێکی دیکەی کۆبوونەوەکەدا باس لە هاندانی کۆمپانیا و وەبەرهێنەرانی یۆنانی کرا لە هەرێمی کوردستان، جێگری سەرۆکوەزیرانى هەرێم، جەختی لەوە کردووەتەوە “حکومەتی هەرێم کارئاسانیی تەواو دەکات بۆ وەبەرهێنەرانی یۆنانی کە دەیانەوێت لە کەرتەکانی پیشەسازی و کشتوکاڵ و گەشتوگوزاردا وەبەرهێنان بکەن”.

“هەردوولا هاوڕابوون لەسەر دەستپێکردنی گەشتی راستەوخۆی ئاسمانی لە نێوان هەرێمی کوردستان و یۆنان، وەزیری دەرەوەی یۆنان بەڵێنی دا بۆ ئەم مەبەستە لە ماوەیەکی نزیکدا کۆبوونەوە لەگەڵ کۆمپانیاکانی فرۆکەوانی بکات”، وەک لە ڕاگەیەندراوەکەى فەرماگەکەى حکومەتى هەرێم هاتووە.

https://www.facebook.com/qubadtalabaniofficial/posts/526414712179388

لەلایەکى دیکەوە، قوباد تاڵەبانی لەگەڵ جۆرج گیورگارتاس، وەزیری کشتوکاڵی یۆنان کۆبووەوە و پێکەوە تاوتوێی چەند پلانێکیان کرد بۆ کاری هاوبەش لە بواری کشتوکاڵدا.

لە کۆبوونەوەکەدا، جێگری سەرۆک وەزیران، ئاماژەی بەوەدا “حکومەتی هەرێم پلانی هەیە بۆ گەشەپێدانی کەرتی کشتوکاڵ و تێڕوانینی حکومەت وایە‌ کە؛ کوردستان لە داهاتوویەکی نزیکدا ببێتە سەبەتەی خۆراکی عێراق و ناوچەکە”. لەم چوارچێوەیەشدا پێشوازی لە کاری هاوبەشی نێوان یۆنان و هەرێمی کوردستان دەکات و هەموو کارئاسانییەک بۆ وەبەرهێنەرانی یۆنانی لە هەرێم دەکرێت.