عێراق سێیەم گەورە هاوردەکارى کاڵا و شمەکى تورکییە

ئاستى هەناردەى تورکیا بۆ وڵاتان بە ڕێژەى 13.1% بەرزبووەتەوە، عێراقیش سێیەم گەورە کڕیارى کاڵا و شمەکى ئەو وڵاتە بووە.

بەگوێرەى ئامارێکى دەستەى ئامارى تورکیا، مانگى ئابى ئەمساڵ، تورکیا بە بەهاى 21 ملیار و 337 ملیۆن دۆلار، کاڵا و شمەکى هەناردەى وڵاتانى جیهان کردووە.

لە ئامارەکەى دەستە تورکییەکەدا هاتووە، هەر لەو مانگەکدا، عێراق بە بەهاى یەک ملیار و 258 ملیۆن دۆلار ڕیزبەندى سێیەمى وڵاتانى گرتووە لە ڕووى هاوردەکردنى کاڵا و شمەکى تورکییەوە.

لە ڕیزبەندى یەکەم و دووەمى گەورە هاوردەکارانى کاڵا و شمەکى تورکی، ئەڵمانیا بە یەک ملیار و 664 ملیۆن دۆلار و ئەمریکا بە یەک ملیار و 483 ملیۆن دۆلار دێن.

تورکیا ئاستى هاوردەکردنیشی لە مانگى هەشتدا بە ڕێژەى 40.4% زیادى کردووە و بە بەهاى 32 ملیار و 531 ملیۆن دۆلار، پێداویستى هاودەى وڵاتەکەى کردووە.