ئەندازیارێکی خۆراک: ئاو و خۆراکی بەر تیشکی خۆر مەکڕن
هۆکارەکەی بزانە
هەموومان ڕۆژانە خۆراک و ئاو وەک پێداویستییەکی سەروکی دەکڕێن، شارەزایەکی خۆراک ئامۆژگاریمان دەکات، ئاو و خۆراکی بەر تیشکی خۆر نەکڕین.
لەشکر حەمید، ئەندازیاری خۆراک لە فەیسبووکی خۆیەوە هۆشداری داوە و ڕایگەیاندووە، “نا بۆ کڕینی ئاو و خۆراکی بەر تیشکی خۆر”.
ئەو ئەندازیارەی خۆراک ئاماژەی بەوە کردووە، “زیاتر لە ماوەی 10 ساڵە زۆرترین کارم لەسەر ئەوە کردووە خۆراک و ئاو و ساردی لەبەر تیشکی خۆر و پلەی گەرمی بەرز و دەرەوەی دووکانەکان دانەندرێن، چونکە کاریگەریی خراپ دەکاتە سەر پێکهاتەی خۆراک و ئاو و ساردی، دەبێتە هۆی تێکچوون و خراپبوونیان”.
لەشکر حەمید ئەوەشی خستووەتەڕوو، “بە تایبەتی بوتڵە پلاستیکی و ڕوونەکان کاریگەری تیشکی خۆر ڕاستەوخۆ دەبێت لەسەریان”.
باسی لەوەش کردووە، “دانانی ئەو پێداویستییانە لەبەر خۆر، دیاردەیەکی زۆر ناتەندروست و نەگونجاوە، لە ساڵانی ڕابردوو تا ئاستێکی باڵا ئەم دیاردەیە کەمی کردبوو، بەڵام بەداخەوە خەریکە دەست پێ دەکاتەوە”.
”لە ئێستاشەوە کە بەرە و وەرزی بەهار و هاوین دەڕۆین، کاریگەریی تیشکی خۆر و پلەی گەرمی زیاتر دەبێت، بە سوپاسە بەشێکی زۆری مارکێتەکان و دوکانەکان ئەم دیاردەیان بنبڕ کردووە”، وەک شارەزاکەی خۆراک ڕایگەیاندووە.
داواشی کردووە، “هاوڵاتییان هەڵمەتێکی هۆشیاریی گەورە ڕابگەیەنن و بەهیچ جۆرێک ئاو و ساردی و خواردنی دەرەوەی مارکێتەکان نەکڕن بۆ ئەوەی بەهەموو مان بنبڕی بکەین”.
