ڕەنگە جوڵەیەکى بچووک دەرفەتێکى گەورەى کارکردنت پێ ببەخشێت

پشتیوان جەلال

بە چیرۆکێک دەستپێدەکەم بۆ ڕوونکردنەوەى ئەو جوڵە بچوکەى مەبەستمە؛

لە شوێنێکى گەشتیاریی نێو شارى سلێمانى کە بە شوێنێکى ڕاقی ناودەبرێت و ئوتێل و ڕێستۆرانتى تێدایە، گەنجێکى بە ڕەگەزە عەرەب بۆ ماوەیەکى درێژوەک پاککەرەوە کار دەکات، ئەو شوێنە سەرتاشخانەیەکەى لێیە، گەنجێکى کورد بەڕێوەى دەبات، ڕۆژێک گەنجە کوردە دەلاکەکە، بیرۆکەیەکى بۆ دێت و پێشنیاز بۆ گەنجە پاککەرەوەکە دەکات، قژ و ڕیشی بۆ چاک بکات و قژیشی بۆ دابهێنێت.

ئەویش لە وەڵامدا پێی دەڵێت، “من پارەم پێ نییە و مەگەر لەکاتى وەرگرتنى موچەکەم لە کۆتایی مانگدا پارەى سەرچاککردنەکەت پێ بدەم”، دەلاکەکە ڕازى دەبێت و کارێکى جوانى بۆ دەکات، لەکاتى باسکردنى ئەم چیرۆکە وتى، “ئەو گەنجە عەرەبە، چاوێکى سەوزى جوانى هەیە و گەنجێکى قۆزە بەڵام هیچ گرنگى بەخۆى نەدەدا بۆیە ئەو بیرۆکەیەم بۆ هات”.

پاش ئەوەى پاککەرەوەکە بۆ یەکەمجار بە ستایلێکى جیاواز و قۆزەوە دەردەکەوێت و سەرقاڵى کارەکەى خۆى دەبێت، خاوەنى شوێنەکە کە بزنسمانێکى دیارى سلێمانییە، بە ڕێکەوت سەردانى ئەو شوێنە دەکات و دیبینێت، ڕاستەوخۆ بانگى بەڕێوەبەرى شوێنەکە دەکات و دەڵێت، “کارى ئەو گەنجە بگۆڕن و بیکەن بە کارمەندى پرسگە”.

دەلاکەکە کە ئەم چیرۆکەى بۆ گێڕامەوە، زۆر دڵخۆش بوو کە بە هەنگاوێکى بچوک و تەنها قژداهێنانێک توانى ژیانى کارى ئەو گەنجە پاککەرەوە بگۆڕێت، چونکە لەو شوێنە کارى پاککردنەوە نزمتریت موچەى هەیە، کارى پرسگەش پێگەیەکى باشى هەیە لەڕووى موچە و پلەوە.

ئەم چیرۆکە، ئەوەمان پێ دەڵێت، کە جوڵەیەکى بچوک دەکرێت ببێت بە خاڵى گۆڕینى کارەکەت بۆ باشتر.

لێرەوە بە کورتى باس لە گرنگیی جوانى ڕوخسار و جلپۆشین دەکەم، لەسەر ئەدات لە شوێنى کارەکەت و تەنانەت لەسەر وەرگرتنت لەو کارەى کە هەوڵى بۆ دەدەیت.

بەگوێرەى ڕاپۆرتێکى گۆڤارى فۆربس، ئەو کەسانەى کاریان دەستدەکەوێت، زیاتر لە نیوە ئەو کەسانەن کە “خاوەنى سیمایەکى باشترن لەڕووى جلوبەرگ و لەشولارەوە”، هەروەها باس لەوەش دەکات، سیما و ڕێکوپێکى پۆشین بە ڕێژەى 5% قازانج زیاد دەکات بۆیە خاوەن کار زۆر گرنگى پێدەدات، هەروەها ناڕێکى و ناشرینى سیماش دەبێتە هۆى لەدەستدانى موچە بە ڕێژەى 7 بۆ 9%.

ژیانى کارکردن سێ قۆناغى سەرەکییە، یەکەم، چاوپێکەوتنى کار بۆ ئەوەى ئەو کارەت دەست بکەوێت، دووەم، دەستپێکى کار، سێیەم، بەردەوامى و کۆشش بۆ بەدەستهێنانى زیاتر، هەر سێ قۆناغەکە بە تایبەت قۆناغى یەکەم و دووەم، پێویستى بە شیکپۆشى و جوان دەرکەوتن هەیە بۆ ئەوەى چواردەورەکەت سەرسام بکەیت.