دۆسییەى نەوت و گازى هەرێم لەسەر مێزى گفتوگۆى وەزارەتى نەوتى عێراقە

وەزارەتى نەوتى عێراق لە کۆبوونەوەیەکدا، دۆسییەى نەوت و گازى هەرێمى کوردستانى تاوتوێ کردووە و ڕایگەیاندووە، “ئەو دۆسییەیە لەسەر مێزى گفتوگۆدایە”.

لە ڕاگەیەندراوێکدا، وەزارەتى نەوتى عێراق ئاشکرای کردووە، بە ئامادەبوونى ئیحسان عەبدولجەبار، وەزیرى نەوتى عێراق، گەڕى سێیەمى کۆبوونەوەکانى نێوان وەزارەتى نەوت و کۆمپانیاى نەوتى نیشتمانیی عێراق بەڕێوەچوو، “دۆسییەى نەوت و گازى هەرێم، گفتوگۆى لەبارەوە کرا”.

وەزارەتەکە ئەوەشى خستوەتەڕوو، لەو کۆبوونەوەیە گفتوگۆ لەبارەى “بەڕێوەبردنى کەرتى نەوت و گازى هەرێمى کوردستان بەگوێرەى دەستوور بە باشترین شێوە”.

لەو کۆبوونەوەیە، “شارەزا و پسپۆڕى نێودەوڵەتى و ناوخۆیی لەبوارى نەوت و وزە و دەستوور ئامادە بوون، لەگەڵ ستافێکى چاودێریی دارایی”، وەک وەزارەتى نەوتى عێراق ئاماژەى پێکردووە.

ئەوەشى ئاشکراکردووە، “گفتوگۆ لەبارەى گرێبەستەکانى ئێستا و داهاتى هەرێم کراوە، تێبینیی پیشەیی و گرێبەستى و دارایی و یاسایی تۆمار کراوە”.

https://www.facebook.com/IhsanIsmaael/posts/367101518756276